تعلیم سب کے لیے کے نعرہ کے ساتھ  نیپال سرکار نے ابتدائی ثانوی اور عالی درجات کے تمام تعلیمی اداروں کو ایک قومی دھارے میں لانے کے فیصلہ کے ساتھ معیار تعلیم میں عمدگی اور بہترین کارکردگی کے لیے بہت سارے مناسب اقدامات کیے ہیں۔ سرکاری نجی، سماجی اور مذہبی حیثیت سے قائم شدہ تعلیم گاہوں کی قانونی حیثیت بحال رکھتے ہوئے ان کے لیے اور نئے منصوبوں کے تحت قائم کیے جانے والے اداروں کے لیے راہنما اصول مرتب کیے اور حالات و ظروف کے مطابق طے شدہ ضابطوں میں ترامیم کی کوششیں ہوتی رہی ہیں جہالت و ناخواندگی کی شرح میں خاطر خواہ کمی لانا ہی نیپال سرکار کی اولین ترجیحات میں شامل ہے۔ چھوٹے بڑے تمام ادارے حکومت کی تعلیمی نگرانی میں ہوتے ہوئے تعلیم و تربیت کا معیار بہتر کرنا، انتظام و انصرام میں شفافیت اور ادارتی نظاموں کی بے راہ روی اور بے ضابطگی سے پاک کرنا شکچھا نیماولی یا ضابطہ تعلیم کا اصل نصب العین ہے۔ تعلیمی قوانین میں بکرم سمبت ۲۰۵۹ بکرمی کے ضابطہ تعلیم کو کلیدی حیثیت و اہمیت حاصل ہے۔
ڈاکٹر سلیم انصاری  (جھاپا) نے محنت بسیار کے بعد اردو زبان میں اس کا خلاصہ تیار کیا ہے تاکہ اردو داں طبقہ بھی اس تعلیمی ضابطہ سے کماحقہ واقف ہوسکے اور نیپال حکومت کے آئین و منشور کے مطابق اپنے اداروں کا تعلیمی و ادارتی نظام بہتر بناسکے۔ ان شاء اللہ جلد ہی یہ کتاب زیور طبع سے آراستہ ہوکر منظر عام پر آئے گی۔